Blog Oficial do Noitebra F.C.: Atletismo: V Media Maratón A Coruña 21 (FGA)

Nova visita á cidade de A Coruña dos atletas do Noitebra, nesta ocasión para participar na V Media Maratón A Coruña 21, homologada pola RFEA e xa clásica no calendario da FGA.

Fran e Mallo. Foto: La Voz de Galicia

Amplo número de noitebros nesta carreira celebrado a mañá do domingo, cuns cantos deles facendo “ensaios” para a Maratón de abril nesta mesma localidade.

Foto: Caamaño

Como xa case é costume nestes últimos meses, domingo a priori non moi propicio para vestir de curto, polo frío e pola choiva que nos daba a benvida segundo nos achegábamos á cidade herculina.

Unha vez recollidas as minicamisetas e os nosos dorsais tocaba pensar en como protexerse do que parecía que ía ser unha carreira pasada por auga. E esta circunstancia nunha media maratón cobra bastante importancia. Quecemento pola zona para aclimatarnos, onde xa puidemos ver ao noso paisano Pedro Nimo preparándose para unha proba na que xa ten triunfado en anteriores edicións.

Marcos L. e Jorge G. Foto: Caamaño

Logo se botou enriba a hora da saída, e grazas aos caixóns por tempos nos puidemos situar sen maior problema no lugar que nos correspondía. Pero o malo foi que chovía e chovía, sen que se realizase a saída, polo que a xente se comezaba a impacientar e molestar ao estarse mollando. E ao fin arrincamos para afrontar da mellor maneira posible os 21 km e pico. Ritmo vivo de partida, como case sempre que fai frío, e por tratarse dun circuíto practicamente chan. Menos mal que o día foi mellorando e ao final ata tivemos un día ben decente para correr.

Foto: Caamaño

Moita xente había (case 1.200 persoas), con diversos obxectivos, pero está claro que os “populares” cada día se preparan mellor e así se reflicte no nivel. En canto aos nosos, obxectivos varios, pero destacar unha vez máis o feito de ter tres rapazas competindo, con Puri Bermúdez entre as mellores, Ángeles Vázquez correndo ata o final a pesar das molestias físicas que arrastraba, e Belén Noya gozando dunha carreira longa como non o facía hai tempo.

Foto: M. Rodríguez

En canto aos nosos rapaces, destacar a Mallo, coa mente posta no maratón, e que o fai mellorar día a día. E tamén moi ben os outros aspirantes a rematar a maratón de abril, como son Marcos Losada, Pepe Bermúdez T. ou Fran Méndez... sen esquecer a Gonzalo Silva, todos eles moi próximos nas súas marcas. Fernando Antelo e Ramón Alende, tamén moi próximos en tempos e lebres de Puri, aínda que fose á distancia. E Nacho Liñares gran parte da carreira ben acompañado das nosas rapazas (é parvo o rapaz...).

Foto: M. Rodríguez

Finalmente un servidor (Miguel Nogueira) a ritmo cómodo ata os últimos km onde un cambio de ritmo progresivo valeu para conseguir marca persoal nesta carreira e na distancia homologada. Lamentar o abandono de Dani Noya, pero dende aquí o queremos animar para que se recupere pronto e continúe cos seus adestramentos para tentar o asalto á Maratón. Terá toda a axuda nosa que necesite.

Foto: R. Suárez

Na xeral masculina vencería Mohemed Boucetta e na feminina Fátma Ayachi. Destacar o 3º posto na xeral feminina da nosa amiga Yolanda Gutiérrez, e iso a pesar de non ir ao seu máximo potencial.

Foto: M. Rodríguez

Bo avituallamento final, con pan de noces e pan de chocolate, auga, plátano, mazá, Powerade... o cal compensaba un pouco tema das camisetas. En xeral pois, boa organización e trato, e, sobre todo, excelente percorrido para ir por marcas persoais.

Se non o facemos antes, a próxima viaxe á Coruña será xa en abril para o Campionato Galego de Maratón.

Fotos de grupo grazas a M. Losada