Aprobados por unanimidade en Asemblea Xeral Extraordinaria o 20 de abril de 2018.
* ESTATUTOS DO CLUB *
NOITEBRA FÚTBOL CLUB
CAPITULO I
NORMAS XERAIS
Artigo 1º
O Club NOITEBRA FÚTBOL CLUB é unha Asociación privada con personalidade xurídica
e capacidade de obrar, integrada por persoas físicas ou xurídicas, con
personalidade xurídica propia e capacidade de obrar, con domicilio na Comunidade
Autónoma de Galicia, que ten como obxecto primordial o fomento e o impulso da
práctica continuada dunha ou varias modalidades deportivas, así como a
participación en actividades e competicións deportivas calquera que sexa o seu
nivel e destinatario.
Artigo 2º
O Club NOITEBRA FÚTBOL CLUB practicará como principal modalidade deportiva
a de FÚTBOL, e solicitará a ratificación dos Estatutos e a inscrición no
Rexistro de Entidades Deportivas de Galicia, de conformidade coa Lei do Deporte
de Galicia. O Club NOITEBRA FÚTBOL CLUB practicará así mesmo as modalidades
deportivas de ATLETISMO, CICLISMO, SURF, MONTAÑISMO E TRÍATLON, e para tal fin
funcionarán as seccións deportivas correspondentes, sen prexuízo de que a
Asemblea Xeral poida acordar a creación doutras, e para as cales a Xunta
Directiva elaborará e aprobará cadanseu regulamento de réxime interno.
Artigo 3º
1.- As cores principais e representativas do Club NOITEBRA FÚTBOL CLUB son
o laranxa e o negro, que predominarán no seu escudo, na indumentaria deportiva
do Club e demais elementos representativos.
2.- O escudo do Club terá forma de cruz e incluirá no seu interior as
iniciais do nome do club, un balón clásico de fútbol e un círculo interior co
nome do club, o nome da cidade de Santiago de Compostela, xunto coa figura dunha
ave noitebra e dúas espigas.
3.- Para calquera modificación dos elementos representativos do Club será
necesaria a aprobación en Asemblea Xeral co voto favorable da totalidade dos
seus socios e socias de número.
Artigo 4º
O Domicilio Social do Club NOITEBRA FÚTBOL CLUB fíxase na Rúa do Limpadoiro
s/n, Angrois. C.P. 15702. Poboación Santiago de Compostela. Concello de
Santiago de Compostela, provincia de A Coruña.
Teléfono: 676550168
E-Mail: noitebrafc@gmail.com
O Presidente/a, cando as circunstancias o aconsellen, poderá acorda-lo
cambio do domicilio social dentro da mesma localidade. Para o traslado do
domicilio a outra localidade, que deberá ser sempre dentro do territorio da
Comunidade Autónoma de Galicia, será necesario o acordo maioritario da Asemblea
Xeral Extraordinaria.
En ámbolos casos, o traslado de domicilio social non implicará modificación
estatutaria, e terá que ser notificado ós socios/as, e ó Rexistro de Entidades
Deportivas de Galicia.
CAPITULO II
CLASES DE SOCIOS/AS, ADMISIÓN.
DEREITOS E OBRIGAS
Artigo 5º
O número de socios/as será ilimitado. A Asemblea Xeral poderá suspender,
non obstante, a admisión de novos socios/as por motivos debidamente
xustificados. Os socios/as poderán ser das seguintes clases: de número,
honorarios, aspirantes e protectores.
Artigo 6º
1.- Son socios/as de número tódalas persoas maiores de idade, que
satisfagan a cota social establecida pola Asemblea Xeral.
2.- Os menores de 18 anos, clasificaranse como socios/as aspirantes, tendo dereito
ó uso dos servizos e das instalacións sociais do Club mediante a cota que se
fixe e pasarán automaticamente a ser socios/as de número ó cumpriren a maioría
de idade.
3.- Serán socios honorarios aquelas persoas ás que a Asemblea Xeral confira
esta distinción e terán un posto de preferencia nos actos oficiais da
sociedade.
4.- Poderán adquirir a condición de socios protectores as persoas ou
entidades patrocinadoras do Club, mediante acordo da Xunta Directiva.
Artigo 7°
1.- Os socios/as de número terán os seguintes dereitos:
a) Contribuír ó cumprimento dos fins específicos do Club.
b) Esixir que o Club se axuste ó disposto na normativa autonómica deportiva
e ó establecido nos presentes Estatutos.
c) Separarse libremente do Club.
d) Coñece-las actividades do Club e examina-la súa documentación, previa
petición razoada ó Presidente/a.
e) Expor libremente as súas opinións no seo do Club.
f) Ser elector e elixible para os órganos de representación e goberno do Club,
sempre que teña plena capacidade de obrar.
2.- Son obrigas dos socios/as de número:
a) Aboa-las cotas que esixa a Asemblea Xeral.
b) Contribuír ó sostemento e difusión do deporte ou modalidades deportivas
desenvoltas no Club.
c) Acatar cantas disposicións dite a Asemblea Xeral, a Xunta Directiva ou
Presidente/a, para o bo goberno da sociedade.
3.- Os socios/as aspirantes terán dereito a aproveitarse dos servizos e
instalacións sociais do Club.
4.- Os socios protectores terán dereito a aproveitarse daqueles servizos e instalacións
sociais que se determinen.
Artigo 8º
Para ser admitido como socio/a, en calquera das súas modalidades, será
necesario:
• Te-la idade sinalada para cada unha delas.
• Solicitude por escrito dirixida ó Club.
• Satisface-la cota de ingreso correspondente.
Artigo 9º
A condición de socio/a pérdese:
• Por vontade propia.
• Por falta de pago da cota anual, previo requirimento de pago, e
consecuente Resolución do Presidente/a.
• Por acordo do Presidente/a no seu caso, fundado en faltas de carácter
grave, previa audiencia do interesado/a, que haberá de ser ratificado na
primeira Asemblea Xeral que se celebre.
• Por calquera outra causa establecida na lexislación vixente.
CAPITULO III
ÓRGANOS DE REPRESENTACIÓN E
GOBERNO
Artigo 10°
Son órganos de representación e goberno do Club, a Asemblea Xeral e o
Presidente/a.
Artigo 11°
O Presidente/a é o órgano executivo do Club, posúe a representación legal,
convoca e preside os órganos de representación e goberno executando os acordos destes.
O cargo de Presidente/a é a título gratuíto e carente de interese nos
resultados económicos da explotación, por si mesmo ou a través de persoa
interposta.
Será elixido mediante sufraxio libre, directo, igual e secreto por e entre
os membros da Asemblea Xeral, cada 4 anos.
Artigo 12º
O Presidente cesará por:
a) Transcorre-lo prazo polo que foi elixido.
b) Dimisión.
c) Falecemento ou incapacidade física ou psíquica para continuar no
exercicio do seu cargo.
d) Aprobación dunha moción de censura pola Asemblea Xeral.
e) Pola perda dunha cuestión de confianza en Asemblea Xeral.
f) Inhabilitación por sentenza xudicial firme ou sanción deportiva.
Artigo 13°
1.- Como órgano complementario dos de goberno e representación, poderá
haber unha Xunta Directiva que actuará como órgano colexiado de xestión do
Club, e exercerá as funcións que este estatuto lle confire.
2.- Os membros da Xunta Directiva serán designados e revogados libremente
polo Presidente/a, debendo dar conta diso na primeira Asemblea Xeral que se celebre.
3.- A Xunta Directiva estará composta polo Presidente/a, un ou varios
Vicepresidentes/as, o Secretario/a, o Tesoureiro/a e un ou varios vogais.
Tódolos cargos serán gratuítos e carecen de interese nos resultados económicos
do Club por si mesmos ou persoa interposta.
Artigo 14°
1.-A Xunta Directiva quedará validamente constituída en primeira
convocatoria cando concorran a ela a maioría dos seus membros. En segunda
convocatoria será suficiente a concorrencia, polo menos, de tres dos seus
membros, e, en todo caso do Presidente/a e do Secretario/a.
2.- A Xunta Directiva convocarase polo Presidente/a con dous días de
antelación como mínimo, á data de celebración.
A Xunta Directiva quedará tamén validamente constituída cando estean
presentes tódolos seus membros, aínda que non tivese mediado convocatoria
previa.
3.- En especial corresponde á Xunta Directiva:
a) Dirixir a xestión do Club, velando polo cumprimento do seu obxecto
social.
b) Formular o inventario, memoria e orzamento anual, que se someterá a
aprobación da Asemblea.
c) Aplicar tódalas medidas deportivas, económicas e administrativas
precisas para o fomento e desenvolvemento do deporte dentro do Club.
4.- Os acordos da Xunta Directiva adoptaranse mediante asentimento con
carácter preferente. De non ser posible, adoptaranse co voto favorable da
maioría simple dos presentes. No caso de empate, o voto do Presidente/a terá
carácter de voto de calidade.
Artigo 15º
Das Vicepresidencias:
1.- O Presidente/a poderá nomear un ou varios Vicepresidentes/as. Cada
Vicepresidente/a quedará vinculado/a a unha sección deportiva concreta, da que
será responsable e por cuxo correcto funcionamento e desenvolvemento velará.
2.- O Club NOITEBRA FÚTBOL CLUB contará como mínimo coas seccións
deportivas de FÚTBOL, ATLETISMO, CICLISMO, SURF, MONTAÑISMO E TRÍATLON, sen
prexuízo doutras seccións deportivas que poida acordar crear o Club á marxe do
disposto nestes estatutos. Cada unha destas seccións estará baixo a
responsabilidade dun Vicepresidente/a nomeado polo Presidente/a e contará cun
regulamento de réxime interno propio elaborado pola Xunta Directiva, de
obrigado cumprimento para os integrantes da sección deportiva da que se trate.
3.- O Presidente/a nomeará a un Vicepresidente/a Primeiro/a, quen ostentará
as funcións representativas do Presidente/a en defecto deste cando concorra
ausencia xustificada, enfermidade, forza maior ou algunha das causas de cese
previstas no artigo 12º. Neste último suposto, ditas funcións exerceranse só
ata o nomeamento dun novo Presidente/a en Asemblea Xeral.
Artigo 16º
O Secretario/a da Xunta Directiva coidará do arquivo da documentación,
redactará cantos documentos afecten á marcha administrativa do Club e levará o
Libro de Rexistro de Socios/as e o Libro de Actas.
Artigo 17°
1.- O Tesoureiro/a da Xunta Directiva será o depositario do Club, asinará
os recibos, autorizará os pagamentos e levará os Libros de Contabilidade.
2.- Será obriga do Tesoureiro formalizar, durante o primeiro mes de cada
ano, un balance de situación e as contas de ingresos e gastos, que se porán en coñecemento
de tódolos socios/as de número.
Artigo 18°
1.- A Asemblea Xeral é o órgano supremo do goberno do Club e estará
integrada por tódolos seus socios/as de número.
2.- As Asembleas Xerais, tanto Ordinarias como Extraordinarias, quedarán validamente
constituídas en primeira convocatoria cando concorran a ela a maioría dos seus
asociados. En segunda e última convocatoria media hora más tarde, quedará constituída
calquera que sexa o número de membros presentes.
Entre a data de convocatoria e o día sinalado para a súa celebración terán
de mediar, como mínimo, dez días naturais e non poderá transcorrer máis de 20.
3.- O censo de socios/as do Club pecharase ós 15 días dende a data de
convocatoria da Asemblea Xeral, procedéndose previamente á súa actualización e
corrección de erros, debidamente comunicadas ós socios/as mediante as canles
oficiais, se os houber. As solicitudes de alta de novos socios/as recibidas
trala convocatoria da Asemblea Xeral non poderán tramitarse durante o período
asembleario, senón a partires do día seguinte á finalización da Asemblea Xeral.
Artigo 19°
A Asemblea Xeral convocarase polo Presidente/a a iniciativa propia ou do
vinte e cinco por cento, polo menos, dos socios/as de número.
1.- A Asemblea Xeral reunirase con carácter Ordinario, previa convocatoria
do Presidente/a, alomenos unha vez ó ano para tratar as seguintes cuestións:
a) Memoria, liquidación do orzamento, balance do exercicio, rendición de
contas e aprobación se procede.
b) Orzamento para o seguinte exercicio.
c) Proxecto e propostas do Presidente/a ou da Xunta Directiva.
d) Proposicións que formulen os socios/as de número e que terán de ir
asinadas cando menos, polo cinco por cento dos mesmos.
2.- Terá de se celebrar Asemblea Xeral Extraordinaria para a modificación
de Estatutos, elección do Presidente/a, toma de cartos a préstamo, emisión de
títulos representativos de débeda ou de parte alícuota patrimonial, alleamento
de bens inmobles e fixación de cotas dos socios/as, e calquera outro acordo
previsto nestes estatutos ou que se estime oportuno polo Presidente/a ou
proceda legalmente.
Artigo 20°
Os acordos da Asemblea Xeral adoptaranse por maioría simple dos presentes, requiríndose
unha maioría cualificada e un quórum determinado de asistencia para aqueles
asuntos que establezan os Estatutos. Serán vinculantes e de obrigado cumprimento
e terán forza executiva a partires da data da súa adopción, sen prexuízo, por
razón da materia, da posibilidade da súa impugnación perante os órganos
competentes e da Federación Galega Deportiva da modalidade ou perante o Comité
Galego de Xustiza Deportiva.
CAPITULO IV
RÉXIME DOCUMENTAL
Artigo 21°
O réxime documental do Club, constará dos seguintes libros: Rexistro de
Socios/as, de Actas e Contables.
Artigo 22°
No libro de Rexistro de Socios/as, terán de consta-los nomes e apelidos dos
socios/as de número, o seu número de Documento Nacional de Identidade e, no seu
caso, os cargos de representación, goberno e administración que exerzan no
Club. Tamén, hanse especifica-las datas de altas e baixas, e as de toma de
posesión e cese nos cargos aludidos.
Artigo 23º
No libro de Actas, consignaranse as reunións que celebre a Asemblea Xeral e
a Xunta Directiva, con expresión da data, asistentes e a súa sinatura en
documento anexo, asuntos tratados e acordos adoptados. As Actas terán de estar
asinadas, en todo caso, polo Presidente/a e o Secretario/a.
Artigo 24°
Nos Libros de Contabilidade figurarán tanto o patrimonio como os dereitos e
obrigas, e ingresos e gastos do Club, debéndose precisa-la procedencia daqueles
e a inversión ou destino destes.
RÉXIME DISCIPLINARIO
Artigo 25°
Os órganos e socios/as do Club estarán sometidos ó regulamento
disciplinario do Club e ó disposto no Título VII da Lei 3/2012, do Deporte de
Galicia, e a súa normativa de desenvolvemento.
Artigo 26°
Así mesmo, o Presidente/a e os membros da Xunta Directiva responderán
fronte ós socios/as, o Club ou terceiros dos prexuízos que ocasionaren por
culpa ou neglixencia grave, de conformidade coa regulamentación propia do Club
e o Ordenamento Xurídico vixente.
CAPITULO V
RÉXIME ECONÓMICO-FINANCEIRO E
PATRIMONIAL
Artigo 27°
1.- No momento da creación do Club deportivo, o patrimonio fundacional é: 0
€, e non dispón de instalacións e locais propios.
2.- No futuro o patrimonio do Club estará integrado por:
a) As achegas económicas dos socios/as de número, que aprobe a Asemblea
Xeral.
b) As doazóns e subvencións que reciba.
c) Os resultados económicos que poden producir as manifestacións
físico-deportivas que organice a entidade.
d) As rendas, froitos e xuros do seu patrimonio.
Queda expresamente excluído como fin do Club o ánimo de lucro e a
totalidade dos seus ingresos e beneficios aplicaranse ó cumprimento dos seus
fins sociais.
Artigo 28°
O Club poderá gravar e allear bens, mobles e inmobles, tomar diñeiro a
préstamo e emitir títulos transmisibles representativos de débeda ou parte
alícuota patrimonial, sempre que cumpra os seguintes requisitos:
1.- Que se autoricen tales operacións por maioría de dous terzos dos socios/as
de número presentes ou representados na Asemblea
Xeral Extraordinaria.
2.- Que ditos actos non comprometan de modo irreversible o patrimonio da
Entidade ou a actividade físico-deportiva que constitúa o seu obxecto social.
Para a axeitada xustificación deste extremo poderase esixir, sempre que o
soliciten como mínimo o cinco por cento dos socios/as de número, o oportuno ditame
económico actuarial.
3.- Cando se trate de gravar ou allear bens, mobles e inmobles que foran
financiados en todo ou parte, con Fondos Públicos da Comunidade Autónoma, será
preceptiva a autorización previa do órgano competente da Xunta de Galicia.
Artigo 29°
O Club poderá emitir títulos de débeda ou de parte alícuota patrimonial,
que serán nominativos.
Os títulos inscribiranse nun libro que levará ó efecto o Club, no que se
anotarán as sucesivas transferencias.
En tódolos títulos constará o valor nominal, a data de emisión, e, no seu
caso, o xuro e prazo de amortización.
Artigo 30°
Os títulos de débeda só se poderán subscribir polos asociados, e a súa
posesión non conferirá dereito algún especial ós socios/as, agás a percepción
dos xuros establecidos conforme á lexislación vixente.
Artigo 31°
Os títulos de parte alícuota patrimonial han ser asemade, subscritos polos
asociados. En ningún caso estes títulos darán dereito á percepción de
dividendos ou beneficios.
Artigo 32°
Os títulos de débeda e parte alícuota patrimonial serán transferidos
unicamente entre os que teñan a condición de socios/as.
CAPITULO VI
REFORMA DOS ESTATUTOS E
DISOLUCIÓN DO CLUB
Artigo 33°
Os presentes Estatutos só se poderán modificar, reformar ou derrogar, por
acordo da Asemblea Xeral Extraordinaria convocada a tal efecto, mediante votación
favorable dos dous terzos dos socios/as de número asistentes.
A reforma destes Estatutos seguirá, con respecto ó Rexistro Entidades
Deportivas de Galicia, os mesmos trámites administrativos que para a súa
inscrición.
Artigo 34°
O Club extinguirase ou disolverase por acordo de:
a) dos dous terzos dos socios/as en Asemblea Xeral Extraordinaria, convocada
ó efecto.
b) por sentenza xudicial.
c) por outras causas legalmente determinadas.
En todo caso haberá de ser notificado ó Rexistro de Entidades Deportivas.
Artigo 33°
Disolto o Club, o remanente do seu patrimonio social, se o houbese,
aplicarase a fins análogas de carácter deportivo, ben por acordo previo da
Asemblea Xeral ou subsidiariamente polo órgano competente en materia de deporte
da Xunta de Galicia.
