Blog Oficial do Noitebra F.C.: Atletismo: I Media Maratón Solidaria Zona Aberta, Vilagarcía de Arousa (FGA)

Nova carreira de longa distancia para os atletas do Noitebra. Volveríamos a Vilagarcía de Arousa logo duns anos, pero nesta ocasión para participar na I Media Maratón Solidaria Zona Aberta, posible herdeira da proba que xa se celebraba no mesmo circuíto anos atrás.

Foto de grupo grazas Mark

Grande participación de atletas do equipo, o cal ten moito mérito para ser o tipo de proba que era, e xeniais resultados, con Jaime Rivas e Puri Bermúdez como protagonistas.

Domingo algo fresco de entrada, pero propicio para competir, nun percorrido de 3 voltas a un percorrido con poucas variacións no seu perfil, respectando o trazado homologado pola RFEA no seu día.

Saída a tope, como se dunha proba de 10 km se tratase, pero pouco a pouco a carreira foi poñendo a cada un no seu lugar. O gran grupo duns 450 atletas estirouse e fóronse formando grupiños de ritmo. Os nosos fóronse situando en diferentes destes grupiños, salvo algúns noitebros-galgos, que rematarían tirando para adiante en solitario en boa parte da carreira. Un dos grupiños interesantes formados foi o composto por Puri, Ramón e Fernando, dándolle color (laranxa) á carreira.

Gañaría a carreira Santiago López, nos homes, e Miriam Chapela nas mulleres, que lle sacaría só 9 segundos á nosa Puri.

Nos nosos, destacar precisamente o 2º posto na xeral das mulleres para Puri, que ademais faría marca persoal na distancia, e o 4º posto absoluto para Jaime Rivas (Jr.). No obstante non podemos esquecer as tremendas marcas de Jose Iglesias e Carlos Buján ou as progresións de Gonzalo Silva, Xaime Rivas, Mallo, Ramón Alende ou Manolo Moure. Destacar tamén a recuperación de Ángeles Vázquez, que en nada xa estará dando guerra na sección feminina.

Moi boa organización da carreira en todos os sentidos, con excelente trato ao corredor, feito polo cal felicitamos aos responsables, deixándonos como antano un moi bo sabor de boca, e desexando que continúen con novas edicións da proba.