Atletismo: Interruning 2012

O domingo tocou cita na Interruning 2012, celebrada no Porriño.

Foto grazas a gonchi-espino

Por terceiro ano consecutivo participaron atletas noitebros nesta carreira con fama de ter un percorrido rapidiño. Por alá estiveron Nacho, Jonal e Miguel Pirri, coa baixa de Puri por causa da gripe.

Primeiro de nada queremos dedicar esta carreira ao presidente e á presidenta do Noitebra, que veñen de ser papás (pois menos mal que non esperou ata o día 29). Sen dúbida un grande acontecemento para a familia do Noitebra, que ata neste senso tamén vai medrando, e nada máis e nada menos que co primoxénito do presi. Felicitacións Bea e Pepe!!! Xa está tardando facelo socio do club.

Percorrido

No Porriño tivemos un inicio de mañá fresquiño e logo se iría abrindo o ceo para, como sempre, rematar con calor nos últimos kilómetros.

O percorrido, non decepciona. Totalmente urbano, con 10 km practicamente chans e case que homologable. De aí que houbese una grande participación, rematando a carreira máis de 1.300 corredores e corredoras. E iso que pecharon anticipadamente a inscrición, xa que, como ben dicían pola megafonía, as rúas do pobo non dan para máis.

Perfil

Na liña de saída, todos como sardiñas en lata e logo arrancada a todo trapo para completar tres voltas ao circuíto urbano con bastante xente animando, especialmente na rúa principal onde tamén se situaba a meta (e a saída). E hai que ver como ía a xente, notándose que moitos a tiñan planificada para facer marca persoal. 

Foto grazas a safardatxo

En canto aos nosos, marca persoal de Nacho, que tivo un bo día e que xunto cos adestramentos que está a seguir, puido pulverizar a súa marca na distancia. Jonal moi pesado de pernas polo adestramento para a maratón, pero cumprindo. E Miguel con sensacións parecidas a Jonal, pero repetindo practicamente a mesma marca da tempada pasada. Non nos podemos queixar pois. Ao final bolsa con froita, galletas, auga, bebida enerxética, gel de glucosa. Antes xa nos deron unha camiseta de marca. Tamén houbo rosca, como de costume, pero non os callos.

Foto grazas a Gely

 Unha mágoa. No obstante, queremos felicitar á organización da carreira, xa que non debe ser nada fácil controlar unha carreira tan masificada nun lugar tan “axustado”.E o mellor, a causa benéfica do evento, con recollida de alimentos para os máis necesitados. En definitiva, unha careira moi recomendable e apropiada para rachar o crono.

Clasificación
Oficial aquí

Os nosos

Máis fotos no foro de Correr en Galicia