Blog Oficial do Noitebra F.C.: Atletismo: CorreSAN Hipercor (Paxonal do Castiñeiriño)

Esta sábado unha nutrida representación do Noitebra Atletismo participo na terceira carreira do circuíto do CorreSAN celebrada no Hipercor.

Jaime R. á caza de Juan Carlos Mosquera. Foto grazas a Moses

Corríamos polo tanto na nosa casa e fíxose notar non só pola alta participación de noitebros e futuros noitebros (se os sumamos, uns 17 e a pesar das baixas), senón tamén pola grande cantidade de amigos, coñecidos e xente do equipo cos que nos atopamos e que nos animaron ao longo da tarde.

Foto grazas a Davil

A carreira xa a tiñamos máis que estudada e sabiamos de antemán que ía ser dura polos continuos sube-baixa pola zona do Monte do Xeixo, parque do Paxonal e zona do Restollal, na contorna do Castiñeiriño (primeira carreira pedestre que transcorría integramente polo noso barrio - por moito que algúns se confundan co veciño de Pontepedriña alá embaixo onde o río- dende hai xa moitos, moitos anos).

Foto grazas a Moses

Polo tanto, moito respecto ao trazado da proba, onde os escolares darían unha volta que, grazas ao fenómeno do guía que ía en cuad, se quedaría nuns 1,8 km, e os adultos dúas voltas para completar 4,4 km con saída e chegada na porta principal do centro Comercial Compostela (Hipercor-El Corte Inglés).

Foto grazas a Moses

Saída algo tardía dos escolares por mor de controlar plenamente o "cristo" que se foi montando co tráfico de entrada ao centro comercial dende o acceso de Pontepedriña e “Vuelva mañana”. Os nosos, Moisés, Walter e Miguel M. estarían a moi bo nivel e a pesar da dureza do circuíto.

Foto grazas a Moses

Os adultos sairían ás 18:35 h., e de principio os da cabeza o tomarían con calma ao ter que afrontar xa a subida polo Monte do Xeixo cara o Cottolengo. Logo xa se irían embalando pola urbanización do Restollal abaixo ata entrar no parque, para finalmente sufrir a gusto pola subida da rúa Luis Iglesias (onde a casa do noso Presi) ata, de novo, ao centro comercial, e volta a empezar.

Foto grazas a Moses

A proba sería gañada por Juan Pablo Fernández. Nas mulleres vencería Yolanda Gutiérrez (recentemente 4ª no campionato de España de Maratón, celebrado en Tordesillas).

En canto aos nosos, debutaría no equipo, e con gran ilusión Jaime R., e, o que tivo retivo, facendo un 5º posto na xeral (3º na categoría), a pesar, segundo el, de pinchar ao final. Carreirón tamén de Jose, que, de menos a máis, foille collendo o pulso ao percorrido, para rematar case entre os 10 primeiros. Logo iríamos chegando o resto a escasos segundos de diferenza uns doutros, destacando tamén, por non variar, o 1º posto de Puri na súa categoría, e os 3º e 4º posto, respectivamente de Pepe e J. R. Abel (estes tres si que son os auténticos cracks do noso equipo. Quen chegara así a súa idade.).

Foto grazas a Moses

En definitiva, grande carreira, divertida e cun sabor especial por ser na casa, polo que enche de orgullo a resposta que tivo o noso equipo.

Foto grazas a Davil

Agradecer unha vez máis o esforzo feito polos organizadores (mención especial para Iván Sanmartín polos favores feitos), que a pesar das dificultades ofrecidas polo lugar (tráfico, terreo, etc.), souberon ofrecernos un inmellorable escenario para o espectáculo que logo se había ver.

Foto grazas a Moses

Xa non queda nada para a última carreira do CorreSAN, na Cidade da Cultura o domingo 14 de outubro. Bonita carreira na que remataremos dentro da nosa sede deportiva: o Estadio de San Lázaro. Animádevos a participar!! É a última cita na nosa cidade antes da Pedestre de Santiago.